كنت معتقل في بلد عربي

كنت معتقل في بلد عربي
وبتهمة بردو عربية
قالوا كلام كتير
شويه يقولوا خطير
وشويه يبكوا عليه
وشويه يشدوا شعورى وشوية يلطشوا فيه
ويقولوا عليه منظم
قال يعنى عامل تنظيم
ويقولوا واكل ملوخيه
قلت لهم يا اخوانا انا مصري
ضربونى وتفوا عليه
قالوا عايز قال تقلب حكمك
ومش عاجبك الريس يا فطين
تكونش عايز ياد تبقى غفير
في سرايا قالوا امريكانيه
قلت لهم يا اخوانا كلامكم
لامؤاخذه باينه عبيط
ويجيب حموضه ووجع بطن
ومش عايز اقول ولا ازيد
ده انا واحد واخد كليه
ضحكوا وعدوها ليه
قلت طيب انا بحلم
ونفسي بلدنا ده يبقى كبير
اقدر اعيش وامشي براحتى
لا اخاف من لواء ولا حتى وزير
واتكلم واسكت واتحرك واتظاهر
واعمل جمعية
اخدونى رمونى وضربونى
قلت لهم عيب
راحوا شتمونى
قال يعنى مدرس وشالونى
اربعة منهم عاملين عضلات
معرفش بقى قالوا فتوات
وفي الزنزانه وحطونى
قالوا نام والصبح اهى تفرج
وتروح بلدك يا هبيل
وابقى هناك والنبي يا اسطى
ورينا راح تعمل ايه
ويعدى اسبوع ما يعديش
وييجوا لى تانى وياخدونى
لبلدى وقالوا هيرجعونى
ورجعت لبلدى وادينى عايش
زى المجنون شايف ساكت
والله يا بلدنا وفيكى الخير