رسالة عتب

حبيبتي



انا وانتي بينا قصة حب.... من زمن بعيد

من يوم من نزلت من بطن امي..... وليد

يومها بصيت في وشك لقيتك متبسمه

قلتيلي شد حيلك واقف على رجلك..... وخليك شديد

وكبرت وكبر حبك في قلبي ... حب عاصف وفريد

خيرك جري في دمي... جوا الشريان والوريد

مكانش قدامي غيرك, كنت فاكرك الدنيا كلها

ومفيش في العالم ده كله غير اسم واحد... هو اسمك

كنت بقوله وانا سعيد

وسافرت...

سافرت وانخلع فؤادي

سبته فيكي وسافرت واتغربت

وكنت بعد الايام والشهور ليوم اللقا

ويوم لقاكي كان بيبقى عيد

كنت باسمع عنك كلام مش ولا بد

كنت اتجنن واثور وبسناني اكل البعيد

قلتلهم بطلوا غيره وحسد

طول عمرنا كنا السادة وانتو يا ولاد التيت ... عبيد

وكبرت

ورجعت

كنت فرحان ومن الفرحة كنت حاطير

رجعت لحبيبتي وخلاص مفيش فراق

وقلت روحي اتردت لي وانكتبلي عمر جديد

أي

ايه ده؟؟؟

قلم نزل على وشي ورن

بصيت مذهول ومش مصدق, والالم جوايا بيزيد

و... طاخ ............. قلم تاني

في ايه يا حبيبتي ؟ مالك ربنا يهديكي

ليه القسوة دي, ده انا حبيبك.. مش عارفاني؟

الوش ده مش وشك... ده وش عدواني

حاسس منك بجفاء غريب

شكلك مش عايزاني ومش طايقاني

اهلك بيأذوني, وانتي ساكته وشايفاني

وجوك بقه كله دخان وتراب

فين اللي بناكي من الاصل... ده كان حلواني

هل يمكن عشان كبرت بتجافيني

ده انا كل ماكنت باكبر, كان شوقي ليكي بيكبر

ودلوقت لما فتحتلك دراعاتي

بتديني ظهرك.... وقال ايه, مش فاكراني

يظهر الناس كان عندها حق

ياما حذروني منك... و كنت باسد انا وداني

فين نظافة زمان

وفين الروقان

وفين الحب والود

فين راحة البال, والعدل والاطمئنان

الله يسامحك

خليتي دموعي تجري

راح احساسي بالامان

عايزاني امشي واسيبك؟؟؟؟

غيري عملها وطفش............ بس في وسط البحر مات غرقان

حواليكي كام واحد

ناس بتدعي حبك

وهم في الاصل كارهينك وكارهيني

بيشوهوا صورتك

وسيرتك خلوها على كل لسان

وللاسف فضلتيهم عليا

وقابلتيني بالاساءة قصاد الاحسان

مابقيتش عارف احبك ولا اكرهك

مانا لازم زي ما احبك تحبيني

ده الدنيا اخد وعطا

وانا في النهاية........ انسان

قعدت انادي فيكي واحايل

مش سامعاني

قعدت اشكي من الهوايل

وانتي مطنشاني

الناس افتكرتني بكرهك

وقالوا ده معندوش انتماء

قالوا ده جاحد وماطمرش فيه الخير

وانا دمعي عليكي سايل

قلت خلاص مفيش امل

انا حانساكي واعتبرك ماضي جميل وانتهى

وحاشيل قلبي وادوس عليه

ماهو لسه متعلق بيكي, وده ولموأخذه .... هبل

انا لما شكيتك كان عتاب

والعتب طبع الحبيب

مانا لو مش باقي عليكي

كنت بعتك للغريب

طول ماقلبي بينبض, حيفضل ينطق باسمك

وطول ما فيا نفس, وليا في العيش نصيب

حالك مزعلني

مكدرني

منكد عليا

ياحبيبتي فوقي بقى وارجعي

واندهيلي... حتلاقيني قريب

نفسي مره قبل ما اموت

اشوف حبيبتي بتاعة زمان

واعيش في دفا حضنها من جديد

انا لسه شايل جميلك على راسي

ده اللي ينسى الجميل يبقه شيطان

وانا مش شيطان

انا ابنك

ضناكي

اللي لو شاورتيله بالدم يسقي ترابك

وعشان راحتك وعزتك

يموت قرير العين......... فرحان